政Whats噏：外界訊息受限　在囚姚鈞豪呻難捱

大埔區區議員姚鈞豪同另外幾位人士，因去年3月於大埔挑釁及用雷射筆照射便衣警員，被控參與非法集結、無牌管有無線通訊器具等罪名，早前姚被判處監禁3個月。雖然按《區議會條例》，佢並未喪失區議員資格，但同外界通訊大受限制嘅鐵窗生涯，就話好難頂啦！

姚鈞豪嘅社交台日前透露佢嘅在囚情況。話說佢喺監獄裏面，最辛苦嘅係好難收到出面嘅消息同反應，儘管刑期已經過咗半個月，但到依家都未能習慣，亦由於接收嘅外界訊息相當有限，加上被規管嘅條例繁多，好容易就會放棄思考。佢又話遇到啱傾嘅囚友，對方就算刑期長都好，都會選擇樂觀面對，覺得佢哋比自己堅強得多。

至於點樣喺監倉消磨時間，佢話靠睇書，而最近佢就睇咗《動物農莊》同《想像的共同體》兩本書，以及閱讀大學時期嘅文章，佢坦承呢啲昔日嘅文章，其實並冇認真睇過，於是趁呢個時間睇返，希望可以令自己思考更多咁話。