政Whats噏：九龍區議員周五宣誓　涂謹申劉偉聰屬高危

港島區議員早前成為首輪區議員宣誓，民主派區議員「傷亡慘重」，總共有7個人嘅宣誓畀人裁定無效，即時被取消資格（DQ）。政府尋日致函九龍區議員，邀請佢哋今個星期五宣誓。參考早前被DQ嘅港島區議員，涉及舊年民主派「35+」初選案同借議員辦事處出嚟做票站嘅都可能有事，而料涉同案獲准保釋嘅深水埗區議員劉偉聰，同埋未被起訴嘅民主黨(白鴿黨)「老鴿」、油尖旺區議員涂謹申亦屬「高危」。

第二輪區議員宣誓將會今個星期五喺北角社區會堂舉行，屆時民政事務局局長徐英偉作為監誓人。當日由朝早10點鐘開始，打頭陣嘅係深水埗區議員，而政府會喺宣誓儀式後發布宣誓有效嘅區議員名單，而宣誓有效性存疑嘅區議員，監誓人會按相關法例跟進。

目前九龍區分為5個區議會，即黃大仙、觀塘、油尖旺、九龍城同埋深水埗區，係民主派區議員大規模辭職之後，九龍區144個議席入面目前淨係剩低56個區議員，黃大仙只剩3個區議員、深水埗有10個、九龍城有5個、油尖旺有11個，而觀塘就有17個。唔知星期五宣誓之後，仲剩返幾多個呢？

早前畀人DQ嘅港島區議員包括灣仔區議會主席楊雪盈、南區區議員彭卓棋等7人，佢哋都涉及舊年民主派「35+」初選案。徐英偉話佢哋嘅宣誓有效性有問題，當日叫佢哋提供額外資料，但上星期三就一鋪過DQ晒佢哋嘞！

九龍區入面都有唔少「高危一族」，涉及「35+」初選案嘅有鴿黨嘅老鴿涂謹申同埋無黨派嘅劉偉聰，唔知佢哋走唔走得甩呢？之但係，並唔係人人都有被DQ危機，其中「乳鴿」、身兼白鴿黨副主席嘅觀塘區梁翊婷，同該黨「中鴿」、深水埗區嘅袁海文相較低調，冇參加舊年嘅「35+」初選，唔知佢又可唔可以「逃出生天」呢？大家要拭目以待啦！