政Whats噏：黃浩華話接唔到棒　今後與選舉無緣　

政治1日都嫌長，莫講話1年半載喇！變化可以好大，正如資訊科技界人士黃浩華咁，由最初諗住接棒入議會，點知變咗跌棒添！

話說本身係資訊科技界議員嘅莫乃光，上年諗住滿咗4年任期就唔競逐連任，打算「讓位」畀黃浩華。黃今日(20日)喺社交平台貼文，話喺舊年7月就為參選而臨陣磨槍，點知就面臨一連串嘅壓力。

雖然佢冇參加前年嘅民主派「35+」初選，但喺今年1月6日嗰陣都畀警察搜屋同埋辦公室，最後被迫親手解散自己發起嘅公民社會團體「g0v.hk（香港零時政府）」。佢話再加上3月尾知道選民基礎變動後，就知道冇辦法繼續同業界嘅選民「同行」咁話，知道自己同今年以及往後嘅選舉都已經「無緣」。

佢話無論係做業界選委定係做議員，都只不過係一個角色同工具，喺今時今日嘅政局下唔會有空間發揮，所以就決定唔會參選。雖然佢話個決定好唔甘心，但佢打算用另外一種方法貢獻社會，承諾喺未來會繼續關注資訊科技發展，並就相關議題發聲咁話喎。