政Whats噏：立會10月25日搞惜別晚宴　跟足防疫措施

4年一度嘅惜別晚宴，舊年因為立法會延任不少於一年，於是晚宴亦要順延。今屆任期10月底結束，而惜別晚宴就定喺10月25日舉行，當晚由主席梁君彥做東，當然會請埋經常同議員「交手」嘅一眾高官，仲會邀請埋行政會議成員。

仲記得2016年7月嗰個惜別晚宴，當晚都有部份民主派議員出席，但舊年有泛民議員被DQ，之後引發泛民總辭，只係剩返鄭松泰同醫學界陳沛然，鄭松泰早前都被DQ埋，唔知到時唯一嘅泛民議員陳沛然會唔會去呢？

雖則疫情漸趨穩定，但防疫措施都要跟到足：1張枱最多只可以坐12個人；至少要有3分2嘅參加者打咗第一劑新冠疫苗；同埋所有進入宴會廳嘅人都要量度體溫同掃一下「安心出行」。

話時話，依家唔驚到場嘅人士冇打針，只怕冇抗體。事關班高官、行會成員同班議員喺年頭已「身先士卒」，帶頭打疫苗，反而係驚冇晒抗體就真，好似議員葉劉淑儀同田北辰近日都話發現體內嘅抗體幾乎跌到零，去咗做「白老鼠」打多針呀！