政Whats噏：陳茂波偕職員拍MV　預告第二期消費券

財政司司長陳茂波今日(22日)喺社交平台發布二次創作嘅MV，將歌手姚焯菲演繹嘅《戀愛預告》改編為《消費預告》，提醒巿民政府將於下個月1日發放第二期消費券。

呢段片長接近3分鐘嘅《消費預告》模仿卡啦OK，一開頭就注明改詞係容義用，編曲係伍千文，至於MV嘅拍攝背景好明顯就係政府總部，幾位年輕男女職員似乎因為去到糧尾而苦惱，歌詞提到「看看我手袋似是季尾model，何時換有jetso？」十分期盼10月1日嘅來臨，領取第二期消費券以實現期待已久嘅購物目標，而陳茂波就喺片尾登場，同MV裏面嘅男女職員一齊跳舞助興。

話說政府早前宣布向每名年滿18歲港人發放5000港元電子消費券，首輪登記嘅市民喺8月1日領取第一期消費券、10月1日可領取第二期消費券。