政Whats噏：探討體壇精英煉成法　杜凱琹父母：忌工廠式命令

所有家長都期望下一代能有所成就，喺剛過去嘅東京奧運取得佳績嘅港隊乒乓球代表杜凱琹，日前同父母接受教育局局長政治助理施俊輝嘅訪問，探討一下香港嘅精英運動員，究竟喺點樣「煉成」嘅！

凱琹嘅媽咪認為，每個小朋友都有自己嘅專長，建議各位爹哋媽咪平時要多啲時間同小朋友交流，要識得從細節中發掘佢哋嘅潛能先得喎；凱琹嘅爸爸就話教育小朋友切勿好似「工廠生產咁定下死命令」，要求子女聽日就「交貨」。

之不過做得運動員，免不了要成日訓練同出外比賽，同屋企人聚少離多，譬如話杜凱琹為咗備戰東京奧運，差唔多成9個月冇見爹哋媽咪㗎！好在佢嘅努力總算冇白費，喺今屆東京奧運攞咗個銅牌。

雖目睹下一代成為體壇精英，但凱琹爸爸就有啲惋惜個女為咗體育而失去校園生活，以及與同學嘅友誼，但睇到自己個女取得咁好嘅成績，就覺得之前嘅付出都係值得嘅。凱琹嘅父母都話對子女嘅支持同鼓勵好重要，希望呢啲「貼士」對其他家長都有用啦。