政Whats噏：劉偉聰被DQ失議席　宣布議辦停止運作

政府尋日(29日)宣布，10名九龍區嘅區議員宣誓無效，全被DQ，當中包括涉及去年民主派「35+」初選案，但獲保釋嘅深水埗前區議員劉偉聰。今日(30日)佢喺社交平台貼文，話自己嘅議員辦事處已經停止運作，事關已再冇身份同能耐處理區內事務。

劉上周五(24日)完成區議員宣誓，不過民政事務局仍決定褫奪佢嘅議席。佢尋晚得知消息後就喺社交平台貼文，話今後每晚可以早啲返屋企「開罐罐」餵愛貓，又宣布今日開街站與街坊道別。佢今日再貼文，話由於議席已失，因此未完成嘅個案，都會由辦事處同事聯絡居民交代。

佢喺其中一個貼文中，仲引用近排熱門歌曲嘅歌詞，「再見喇下次見啦，有下次嘅話」。或者劉「走嘅時候有少少內疚」，之不過佢身負初選案，又被裁定宣誓無效而被罰停賽5年，睇怕都冇人知下次再見會係幾時喇！