政Whats噏：滂沱大雨水淹場地　渣馬記者會一度中斷

無論舉辦大型體育活動還是開記者會，最頭痛就係遇上突發狀況。將於本月24日復辦嘅渣打香港馬拉松，今早(8日)於維多利亞公園網球場貴賓室，舉行賽事安排預告記者會。儘管記者會場地屬「有瓦遮頭」，但滂沱大雨加上排水管道不暢，夾雜著垃圾同「小強」嘅污水由渠口倒灌而出，四方八面咁湧入位處低窪嘅貴賓室！由於場面實在嚇人，活動主辦方惟有將記者會移師至貴賓室外簷篷底舉行。

其實記者會開始之時，天氣已經好唔穩定，而當記者會進行到一半，天文台突然改發黑雨警告信號。面對淹浸地板嘅污水同「小強」，唔少記者要跳上枱面躲避，記者會亦被迫暫時中斷。之不過，活動主辦方、香港田徑總會主席關祺等人舉辦活動多年，面對過唔少突發情況，對眼前情況處變不驚，淡定咁帶一眾記者涉水步出貴賓室，到室外簷篷底繼續進行記者會。關祺話，睇過天氣，10月底天氣濕度都幾好，幾適合跑步，但如果比賽當日有紅雨或黑雨就會取消啦，希望比賽當日一切順順利利。