政Whats噏：飛機陸續交付　大灣區航空今獲批航空營運許可證

疫情下全球航空業都備受打擊，不過由深圳東海航空董事長黃楚標創立嘅大灣區航空反而喺「疫市」突圍而出，東網得悉其向民航處申請嘅航空營運許可證(Air Operator Certificate)已於今日(8日)獲批，意味起航在望！

根據有關嘅航空營運許可證資料，大灣區航空可以勝任客運及貨運嘅公共交通事宜，而許可證有效期至明年10月31日。而民航處方面就話，喺2020年7月接獲大灣區航空公司嘅航空營運人許可證申請。經仔細及全面評估申請人各方面嘅能力皆符合民航處要求後，民航處處長已按既定機制簽發了航空營運人許可證予大灣區航空公司。

大灣區航空公司行政總裁丘應樺日前曾指出，該公司首架航機日前已率先抵港。正所謂好事成雙，第二架航機亦將會於本月交付；該公司已聘請多名機師及機艙服務員，有部分係疫情下被裁嘅同業，預料今年底員工可達到150人。

翻查資料，大灣區航空首架航機嘅機型係波音737-800，最高載客量可達189人；若同時設有經濟及商務艙，則可運載162名乘客，並計劃於2026年擴張機隊至超過30架飛機。大灣區航空早前申辦104條航線，啟航地點係香港國際機場，當中48個屬於中國內地航點，包括上海及北京等熱門航點；其餘則涉及台灣、日本、南韓及東南亞等航點。