政Whats噏：立會「避風」取消大會　租管海外醫生草案延下周審議

受颱風影響，本港今日(13日)懸掛8號東北烈風或暴風信號，原定召開嘅立法會大會亦要「避風」暫停，議程受到影響。但臨近屆尾，有多條法案「排住隊」上會，突然冇咗一次會，唔知點算好？

早前因太多法案有待處理，擔心立法會唔夠時間討論，於是安排喺10月最後一個星期、即10月27日，加開一次大會。但點知，人算不如天算，加開會之後，颱風殺到就又冇咗一次會議時間。按原定立法會日程表，今屆立法會僅尚餘下周三(20日)同10月27日兩次大會。立法會方面話主席梁君彥作出指示唔召開立法會會議。原先載列於會議議程上嘅相關項目，將於下周三(20日)嘅下次立法會會議處理。

根據立法會議程，今日原定有3條政府法案交付大會恢復二讀同三讀，包括引入非本地培訓醫生嘅《2021年醫生註冊(修訂)條例草案》、引入劏房租務管制嘅《2021年業主與租客(綜合) (修訂)條例草案》及《2021年電訊(修訂)條例草案》。

有議員相信，下周應先做咗今個星期未做嘅議程，包括質詢、法案、議員議案，結束後再傾返該星期議程，預料可能加一日半日會，開埋周四就搞掂啦！又指今個星期議程涉及嘅租管條例及醫生註冊條例，前者大家都有共識，只係後者有小小爭議，但相信都唔會有好大問題咁話。

除咗政府法案，下周亦會討論議事規則委員會主席謝偉俊根據《基本法》第75條動議修訂《議事規則》嘅擬議決議案，再次修訂《議事規則》，例如修訂財務委員會、內務委員會及小組委員會組成等。

其實臨近屆尾，但仲有多條重要嘅政府法案排住隊上大會恢復二讀及三讀，包括下周審議全禁電子煙及加熱煙嘅《2019年吸煙(公眾衞生)(修訂)條例草案》、《2021年強制性公積金計劃(修訂)條例草案》及《2021年財務匯報局(修訂)條例草案》。

另外，仲有已完成逐條審議嘅《2021年電影檢查(修訂)條例草案》，亦要交付大會恢復二讀及三讀。如果呢啲法案最終未能完成審議，將會隨立法會會期結束而「胎死腹中」，一切要推倒重來，到時新一屆立法會需要就法案重新展開立法程序啦。