政Whats噏:黃之鋒獄中過生日 羅冠聰越洋贈興:會唔會害咗佢

2021年10月13日 13:24
東網電視
更多新聞短片
在囚嘅黃之鋒今日25歲生日。
前香港眾志秘書長黃之鋒今日(13)喺獄中渡過25歲生日,佢話喺獄中逼住自己學習獨處,仲話希望成為更成長嘅人,而佢嘅「戰友」、流亡英國嘅前眾志常委羅冠聰就越洋贈興,仲話喺出Post前諗過,到底隔住半個地球同佢講「生日快樂」,會唔會被視為害咗佢嘅一步。
黃之鋒今日喺Facebook貼文,憶起過去度過生日嘅情景,形容好似過山車咁動魄驚心,例如18歲嗰年係爆發違法佔領行動,喺金鐘夏慤道馬路唱生日歌;未夠抨選立法會,佢20歲就喺時任議員羅冠聰嘅議辦慶生,而翌年21歲已因公民廣場案判囚,首度喺監房過生日,而最難忘嘅係舊年朋友為佢提前慶祝24歲生日喎。至於今年第二度喺獄中渡過生日,佢話希望自己成為更有成長嘅人,所記掛同思念嘅,有日得以重逢、再相見。
而被通緝嘅羅冠聰亦喺Fb貼文,話當佢喺2019年6月26號離港之際,佢已經同黃分道揚鑣,話無論之後黃喺香港做嘅事,或者佢喺英國做嘅事,都已經唔再同對方有關,但佢又憶起過往同黃合作嘅點滴。佢話回望返2014年下半年醞釀雙學合作開始,佢哋嘅命運開始慢慢接近;到2016年4月創立眾志之後,喺公眾眼中完全重疊,做嘅所有野,食過嘅所有屎,都係一齊行過。
可能都意識到, 一個流亡海外唔知有冇機會返港,另一個因為仲涉及違《港區國安法》嘅案件,唔知幾時先可以踏出牢房?羅都話事實就係,咁多說話放喺心中,到想真正表達,就已經要等好耐、好耐之後嘞!