政Whats噏:何俊賢探秘  竟然話:一入雞場深似海

2021年10月14日 20:57
東網電視
更多新聞短片
何俊賢(左)參觀雞隻養殖,形容「一入雞場深似海」。
雞係港人餐桌上常見嘅食品,有關「打針雞」嘅種種傳言更加惹人關注。究竟係咪有「打針雞」呢?漁農界議員何俊賢(高佬賢)早前去咗探秘,最後竟然留低咗句「一入雞場深似海」。到底發生咗乜嘢事呢?唔通畀啲雞玩?
咪以為入雞場可以隨隨便便,原來係好嚴格,唔可以兒戲。當日高佬賢就着咗全套防護衣走入雞場之後,都有啲心怯,好婉轉咁問雞場負責人,話外間嘅商業宣傳都標榜售賣嘅雞隻不含激素,點知說話都未講完,對方就已經心領神會。高佬賢所得嘅答案,就係香港養嘅雞確實有打針,只不過唔係激素,而係疫苗。
疫苗?係咁嘅,原來雞仔一出世無幾耐,就要打6、7種疫苗以抵禦多種病毒,而接種方式就要視乎疫苗嘅種類,既有傳統嘅打針注射,亦有眼睛滴藥水,而雞隻接種疫苗後會自行吸收同分解,唔會影響人體健康。由於香港法例唔容許用激素,如有干犯,罰則相當重。當雞隻成長至適合販售,政府會派員為雞隻抽血化驗,確保健康合格先至可以推出街市售賣。
雖然打咗疫苗,倘溫度控制不宜,都會損害雞隻健康。之不過,羽毛較少嘅雞仔好容易會唔夠暖,羽毛已豐嘅大雞就好似着咗羽絨,往往需要降溫,所以雞舍要有電腦控制嘅減熱通風系統,透過冷水通過嘅金屬水簾,以降低流經嘅空氣溫度,冬天就要用熱風機以令到整個雞舍都溫暖。
至於孵化房,恒常保持攝氏38度。為確保雞隻有飲有食,雞舍設有自動餵飼料槽,同埋俗稱「乳頭」嘅自動餵水系統。有趣嘅係,原來雞都有較愚笨之輩,若果有雞隻唔識得從自動餵水機飲水,就會有專人教導,話頂多兩日就會教識喎。
雞有好多種食法,高佬賢就問究竟一隻雞要養到幾耐至適合食用呢?睇嚟佢都好為食呀,場主話雞最好食係養到80日左右。之不過,隨住本港家庭人數少咗,雞場一般60多日就要出雞,否則雞隻隨住飼養日子延長而大隻咗,會較難賣得出。雞隻留到80幾日先至賣嘅機會唔係無,通常係等到過年過節囉!
養雞都咁多學問,聽到高佬賢「頭岳岳」,唔怪之得佢話一入雞場深似海喇!