政Whats噏:民主黨知衰 網頁刪涂謹申等人區議員資料

20211017
東網電視
更多新聞短片
涂謹申已被取消區議員資格,辦事處都遮蓋「區議員」字眼。
政府要求區議員宣誓後,大量民主派區議員辭職,再加上有區議員被政府取消資格(DQ),就連民主黨(白鴿黨)嘅區議員人數都寥寥可數。不過,白鴿黨唔知係自顧不暇定想充大數,日前網頁上仲有包括涂謹申被DQ嘅區議員記錄,而喺東網報道有關事件後,該黨就知衰嘞,今日(17日)就刪除咗相關資料。
話說本來係油尖旺區議員嘅涂謹申,上個月24日出席九龍區嘅區議員宣誓,5日後被列入10名遭政府DQ嘅區議員名單;隨後輪到新界東嘅區議員喺本月4日宣誓,當中16名區議員被DQ,沙田係重災區,佔咗9個,包括白鴿黨嘅吳定霖同鄭則文。
之不過,涂謹申、吳定霖同鄭則文3人嘅名同照片尋日都仲出現喺白鴿黨網頁中嘅區議員部分。「有趣」嘅係,白鴿黨刪啲唔刪啲,因為同涂謹申一齊被列入DQ名單嘅觀塘區議員兼白鴿黨副主席梁翊婷,就已經消失於該黨嘅區議員資料欄,所以真係唔知白鴿黨係唔小心,定係管理員出錯。不過當東網尋日指出網頁問題之後,白鴿黨就終於知衰,刪除番涂謹申3人嘅資料,可能唔想誤導市民啩!