政Whats噏:林卓廷僅3案排期開審 打定輸數獄中有排坐?

2021年10月18日 18:02
東網電視
更多新聞短片
林卓廷(箭嘴示)現被還押。
民主黨前副主席、前議員林卓廷因參與去年民主派「35+」初選,涉違反《港區國安法》被控串謀顛覆國家政權罪,佢至今已被還押多月。佢喺獄中信就話自己體能大有進展,柔軟度都有明顯改善,如果練到雙掌掂地就心滿意足喎。其實林現有6宗案在身,但當中只有3宗已排期開審,佢預料初選案嘅審訊仍遙遙無期,笑指相信有非常充足時間,直言「雙掌掂地絕對不是夢」。唔通佢已打定輸數,要喺獄中有排坐?
今次林卓廷嘅獄中信由前議員邵家臻讀出,林喺信中提到依家只有3宗案件開審,包括披露廉政公署調查案會喺12月開審,至於屯門公園妨礙司法公正案同埋元朗721案件,就分別喺2022年11月及2023年3月開審。至於「重頭戲」民主派初選案,就遙遙無期啦!
佢又喺信中分享囚中生活環境有改善,提到赤柱監獄比荔枝角羈押所好,而荔枝角又比警署「臭格」環境好。佢依家喺赤柱可以入報紙,又可以睇最愛嘅歷史書同棋譜,直言都係一種幸福喎。