政Whats噏：搬傳單扭傷手　李世榮嘆「唔搬唔知自己老」

特首林鄭月娥尋晚喺禮賓府跌倒導致右手肘骨折，事件引起社會熱議。咁啱得咁橋，沙田前區議員李世榮(Stanley)今日(19日)出席記者會時都被發現右手受傷，需要用繃帶包紮，睇落都好似幾嚴重咁喎，究竟做咩咁唔小心呢？

Stanley記者會後話尋日晏晝(18日)幫手搬運傳單，點知唔小心扭親右手，本來都以為無咩大礙，點知今朝一起身就覺得好痛。佢話實在係痛到頂唔順，中午去睇跌打，經診斷係扭傷右手條筋，形容治療過程痛到「眼水都標埋」，嗌痛嘅悽厲叫聲，真係成間跌打醫館都聽到。

明日要再去覆診嘅Stanley，自嘲「唔搬唔知自己老」。對於林鄭尋晚都跌親導致右手骨折，Stanley就話希望佢早日康復。