政Whats噏：指豁免加熱煙易造成漏洞　湯修齊促否決修正案

涉禁止加熱煙同電子煙銷售嘅《2019年吸煙(公眾衞生)(修訂)條例草案》將會喺明日(20日)在立法會恢復二讀辯論。議員邵家輝早前提出將加熱煙納入傳統煙草規管嘅修正案，被立法會主席梁君彥禁止提出。吸煙與健康委員會主席湯修齊今日(19日)再發話，希望議員否決埋另外兩條修正案喎。

雖說邵家輝草擬嘅修正案被禁止提出，但梁君彥就批准另外兩條修正案，分別係議員易志明提出，豁免指定情況下由車輛運載進口嘅另類煙草產品；以及紡織界議員鍾國斌提出，豁免產品開發為由嘅另類煙。湯修齊認為擴大另類煙作為轉運貨物，同埋產品開發用途嘅豁免，容易造成漏洞，甚至助長走私活動，所以促請立法會切勿通過有關修正案。

至於有外媒報道，逾100位煙草減害專家所組成嘅權威小組，喺尋日發表一封公開聲明，批評世界衞生組織對電子煙產品嘅立場過分頑固，錯失可以避免數以百萬同吸煙有關嘅死亡機會。其實該草案都拗咗幾年，唔知二讀嘅時候又會唔會嘈多輪呢？