政Whats噏：立法會通過削區會撥款權　議員稱市民寧願慳公帑捉老鼠

政府建議收回區議會在社區參與計劃及地區小型工程計劃嘅撥款權，立法會財務委員會今日(22日)通過對整體撥款範圍進行技術性修訂，配合地區小型工程計劃的撥款權轉移。有議員直指在黑暴區議員把持下，只談政治、不談民生，甚至有市民認為應取消區議會制度，節省公帑「捉老鼠」更好。

議員梁美芬批評部分泛民主派區議員唔敢宣誓，「禽禽青」辭職，明顯心中有鬼，落得今日嘅下場係與人無尤。佢重提去年時任警務處處長嘅鄧炳強到區議會赴會但不受歡迎，扭曲嘅氣氛令官員難以落區。議員謝偉銓同樣支持收回撥款權，話區議會早已失效，難怪市民認為應該取消制度，慳返公帑清潔街道、捉多啲老鼠、種多啲樹，都好過咁樣嘥。佢又批評原本區議會協助推行地區小型工程，反而變成阻礙建設，同時影響建造業界經營。

另外，議員葛珮帆認為地區小型工程進度一向緩慢，即使規模細，顧問研究費一樣好貴，佢關注日後由政府負責提議進行工程項目，應該完善規劃，例如整合一個地區一併設計、加設設施，帶嚟更好嘅成本效益，而唔係用幾百萬加設一張櫈，令人覺得政府做咩都係貴。

民政事務局副局長陳積志回應話，政府一直追求實用、人性化嘅建設，不過以往區議員眼光較窄，只著眼自己嘅選區，認為葛珮帆嘅提議唔錯，政府可以發揮協同效應，一併設計區內唔同位置嘅扶手、櫈等。佢亦批評區議會喺反對派把持下基本失效，唔單止冇倡議推展項目，甚至阻撓項目，認為日後加強諮詢分區、防火、滅罪委員會等更加直接、暢順，走少區議會程序後有信心可以加快工程。

至於財委會主席陳健波報告尋日係本屆最後一次嘅財委會會議，已經完成審核所有政府提交嘅建議，喺今年度共批出120個項目，涉及嘅承擔額超過3,200億元。