政Whats噏：冷鋒襲港　鄭泳舜大派3大出賽渣馬貼士

今年嘅渣打馬拉松可以喺疫情下舉行，不過天氣不似預期，突然受到冷鋒襲港，天文台暫時預測聽日(24日)比賽嘅最低溫度係攝氏19度。議員鄭泳舜(Vincent)將會出戰半馬賽事，佢就話已經訓練4個月，臨比賽前兩星期已經減量，不過因應氣溫轉低，臨近比賽都會練多1次，測試一下身體嘅適應狀況。

Vincent一啲都唔孤寒，分享3個出賽貼士。第一，佢提醒選手要補充多啲澱粉質，而佢就會食多啲飯。第二，因為天氣凍，最好早啲到達場地，把握熱身時間。第三，切記要帶夠衫，做足保暖，千祈唔好一到陣就換上背心同短褲，最好喺起跑前最後一刻先至換裝。

同樣參加半馬比賽嘅仲有公務員事務局局長聶德權，佢哋兩個仲一齊跟教練練跑添。問到Vincent有冇約局長比賽當日一齊跑，佢話冇約實，見到就見啦，因為跑友之間時間唔同，出發後就各自搞掂，如果見到局長會互相鼓勵！Vincent亦話今次係一個大型嘉年華，希望到時見到唔同相熟嘅朋友喇。