政Whats噏：報名期尋日結束　民協指無會員報名參選立法會

對於是否參選12月嘅立法會選舉，泛民陣營一直爭議不斷，民主黨早前更就是否參選而爆內訌，結果最終都冇黨員報名參選。當大家都以為民主黨掛免戰牌，同為泛民政黨嘅民協應該更大機會派員參選。而該黨早前開放黨員報名參選立法會，報名期尋日(22日)截止，根據安排，執委會今日(23日)開會處理。不過，民協最新公布，截至尋日，執委會並冇收到會員報名參選，故此執委會毋須討論相關事宜。換言之，該黨唔會派人參選立法會選舉。

民協早前就是否派人參選，曾召開會員大會。結果會上通過容許黨員參與立法會選舉，有意參選嘅民協黨員必須喺尋日之前，向民協執委會報名。而外界早前曾盛傳，成功通過區議員宣誓嘅黃大仙區議員廖成利有意參選，但最終都冇報名，估計係評估咗入閘機會及風險。故此，連同早前棄選嘅民主黨，兩大傳統泛民政黨均唔參與新選舉制度下嘅首場立法會選舉。