政Whats噏:辭任區議員後被判刑3個月 文念志重操舊業做紮鐵

20211025
東網電視
更多新聞短片
唔少民主派區議員辭職後,唔係轉行就係搞生意幫補生計。大埔前區議員文念志因被控上年喺大埔一商場非法集結、無牌管有無線電對講機同襲擊警員,7月底時被判囚3個月。早前刑滿出獄嘅佢尋日晨咁早就喺Facebook貼文透露近況,話尋日「重操故技」做番地盤紮鐵佬,仲形容自己「用最污糟既(嘅)手賺最乾淨嘅錢」。
其實文念志喺當選做區議員前就已經靠紮鐵支持日常生活開支。佢喺貼文中話,喺呢個非常壓抑嘅香港,做隻專心搵錢嘅「港豬」都唔錯。佢又話眼見唔同辭職或被取消資格嘅區議員有唔同發展方向或去向,有啲喺外地,有人搞小生意或做番以前嘅正職,至於佢就只係用最污糟嘅手賺最乾淨嘅錢,直言自己「係窮」,但「揸得起支勾(鈎)仔,揹得起頭家」。
由區議員身份再變返地盤佬,唔知佢有咩感受呢?佢就話終於唔使再怕精神疲勞,因為依家似肉體上更攰,仲強調會繼續以不屈不撓嘅精神去生活同工作。佢仲晒出地盤佬個人金句「安全返到屋企當你贏」,「捱過大暑當你贏」咁話。
睇返今屆幾位已辭職嘅區議員都紛紛「轉行」,希望另覓出路。沙田前區議員趙柱幫喺7月初辭職後,雖然自畢業後一直從事社福工作,但為保兩餐就考咗牌投身地產代理嘅工作。
之但係就唔係人人都咁好彩成功,就好似涉詐騙政府發還立法會選舉開支嘅油尖旺前區議員林兆彬,早前就將原本位於太子道某商住大廈嘅議辦改為零售用途,販賣日常生活用品,但僅僅3個月,就喺上星期宣布結業喇!