政Whats噏：梁君彥惜別嘆主席不易為　憑歌詞寄意未敢辜負磨練

立法會今屆任期即將結束，主席梁君彥今晚(25日)喺立會舉行惜別晚宴，宴請特首、3名司長，各問責官員、行政會議成員及一眾議員。梁君彥以「甜酸苦辣」嚟形容5年嘅會期，更引用流行曲《蒙著嘴說愛你》中的「天給我磨練也好，我未敢辜負」，感嘆立法會主席唔易做啊！

梁指立法會近5年經歷唔少苦頭，曾經被示威者包圍衝擊，又有議員拉布、破壞議事秩序。佢又形容行政立法關係在前4年係「勁辣」，會上多次針鋒相對，而前年嘅《施政報告》更唔能夠喺立法會上宣讀。

佢又話有人曾經講過，主席係最孤獨、最辛酸嘅。佢話自己面對歷來規程問題最多、秩序最混亂、衝擊最激烈嘅立法會，而呢屆議會更從未試過齊整70人，有議員被取消資格，又有議員集體辭職，令佢不禁感嘆呢一屆主席真係唔易做啊。不過，佢都認為總能面對嘅，更引用流行曲《蒙著嘴說愛你》中的「天給我磨練也好，我未敢辜負」。

不過，佢話正所謂「食得鹹魚抵得渴」，無論官員定議員都同樣身處「熱廚房」，會被人批評、辱罵，但相信只要虛心聆聽，接受批評，就能將好嘅政策落實到位喎。佢又指今屆立法會亦通過不少惠及民生的議案，相信市民都能甜在心頭，並感激秘書處面對挑戰仍然不辭勞苦，並祝願行政機關與立法會繼續良政善治。

工程界議員盧偉國仲即場用琵琶彈奏《十面埋伏》同埋《獅子山下》，仲講下呢5年議員感受。而一眾議員喺晚宴前一齊影大合照同埋切燒豬，而醫學界議員陳沛然就無出席，其中議員石禮謙、馬逢國同埋容海恩更玩自拍添。晚宴上，梁君彥又向早前跌傷右手嘅特首林鄭月娥送上一張印有卡通林鄭，及寫有早日康復嘅慰問卡，話係立法會設計㗎喎。