政Whats噏:泛民倒戈甄紹南敗選 建制陳有海任屯門區會主席
屯門區議會前主席陳樹英今年7月辭職,為填補其懸空職位,該區議會曾兩次開會補選但都以流會告終,可謂波折重重!點知今日(2日)再度開會選舉新主席時,喺有區議員缺席及懷疑有人倒戈嘅情況下,建制派工會代表陳有海,同原本佔上風嘅民協甄紹南喺兩輪投票中,同取相同票數,最終陳喺抽籤環節中險勝當選為主席。
喺早前嘅區議員離職潮中,屯門區議會有17人先後辭任,包括陳樹英。該區議會分別喺7月底同9月中舉行會議補選新任主席,但兩次都因法定人數不足而流會,拖延至今日會議先再補選。至於有意競逐主席之位者,日前有傳係甄紹南、民主派嘅江鳳儀,以及陳有海3人。按目前屯門區議會11位區議員當中,民主派佔7人,數數手指都知建制派屈居下風,但倘若民主派唔團結的話,建制派或有漁人得利嘅機會。而喺會議開始前,秘書就話江不適缺席,泛民只剩6人,建制就有4人。
之但係萬萬估唔到,陳及甄喺兩輪投票中都各取5票,好明顯就係有民主派做叛將。最終喺抽籤程序中,陳手氣唔錯,抽出較大號碼而當選。陳當選後發言時話,希望區議會可撥亂反正、踏上正途,期望同事日後加強合作,做好屯門民生工作喎。
至於甄紹南就話今次敗選,未能代表民主派奪回區議會主導權。佢又話補選前已進行唔少拉票工作,同埋闡述上任後政綱,當時大部分人即時口頭答應支持,睇帳面應有足夠票數勝出,但遺憾今日有議員不適缺席,佢更懷疑有人陣前倒戈啊。
補選主席終於塵埃落定,有份出席會議嘅屯門區議員、民主黨前成員林頌鎧就話唔評論選舉結果,而副主席黃丹晴則坦言對結果感到遺憾。對於最近3次大會均有區議員不適缺席,佢惟有著大家小心身體,又話「水退就知道邊個冇着褲」,唔希望有人意氣用事,影響整體格局。今次民主派又因為未能協調,加上有人倒戈而白白將主席之位拱手相讓。