政Whats噏：鄧炳強旋風式入院　仲要瞓住睇文件

一向好有「擔當」嘅保安局局長鄧炳強，因為左手肘受傷發炎入醫院做放膿手術，但為咗返工同出席公務活動，佢兩入兩出旋風式住院，仲要帶齊文件邊住邊睇，真係好熱愛工作。鄧Sir今日(6日)出院，雖然表面上睇無大礙，但原來佢傷口仍久久未埋口，需服用抗生素。今次鄧Sir都上咗寶貴一課，日後處理傷口不要掉以輕心，兼顧工作時亦謹記照顧好身體。

連入醫院都離不開工作嘅鄧Sir，今朝約11時出院交代傷勢時話自己上周唔小心擦傷手，之後發炎，前日(4日)傷口腫脹到醫院求診，醫生建議佢進行小手術，為傷口放膿，仲要留院一晚，翌日如常返工，晚上再度入院洗傷口及做跟進檢查，又話傷口日後都要小心啲處理。雖然睇唔到佢左手傷口，但鄧Sir上車時未能用左手閂左邊車門，而要伸長右手代勞，之後，由鄧太陪同下離開，出席下一場公務活動。

據了解，事緣係鄧Sir幾日前手肘不慎撞到門，原本以為擦損好小事，「貼塊膠布就算」，點知去到前日傷口惡化。由於擔心細菌入血，所以鄧Sir當晚到聖德肋撒醫院求診，醫生即刻要佢做完放膿手術同留院1晚，雖然傷口未好，但佢公務繁忙，第二日一早出院返工，尋晚做完嘢又再度入院洗傷口，朝早又要見醫生。

鄧Sir做病人都好勤力，真係帶齊文件喺醫院睇，果然係有「擔當」。鄧Sir嘅傷口因為喺手肘及近骨，由於會不斷郁動，令傷口難以埋口，要食抗生素同盡量唔好郁到個傷口。市民都希望鄧Sir快啲好番，可以「批肘」對付壞人。