政Whats噏:難禁創業衝動 曾素麗再辦「終身大事」

20211106
東網電視
更多新聞短片
曾素麗上個月尾頂手營運婚紗店。
大部分女性一生只得一次穿婚紗嘅機會,但沙田區前區議員曾素麗今日(6日)就喺社交平台宣布自己要辦終身大事,又上載佢嘅婚紗照,睇落好似紅鸞星動咁喎!之不過,三年前佢先至嫁作人婦,點解咁快又再披上婚紗呢?
其實曾素麗係啱啱做咗婚紗店老闆,於是就穿上婚紗做「生招牌」嘞。話說曾素麗當年準備婚禮,以百裏挑一嘅態度嚟揀選婚紗,雖然非常「奄尖」,但亦由此萌生開設婚紗店嘅念頭。今年7月曾素麗辭去區議員工作,為免坐食山崩,於是兩月前喺馬鞍山某商場租咗個舖位經營零售業務,開設婚紗店嘅夢想就此埋藏心底。
但就喺上個月,一次機緣巧合下,曾素麗發現有一間婚紗店頂讓,條件方面亦合乎佢嘅要求,即日就決定頂手。曾素麗形容今次承接婚紗生意係佢嘅「終身大事」,但短時間下重大決定會唔會比較倉促呢?況且,已經有一盤零售生意嘅曾素麗,起初佢都擔心自己應付唔到喎!同埋有無諗過上一手經營呢間婚紗店嘅收支狀況呀?財不入急門啊!