政Whats噏：老鴿李華明唔選立會　退黨與否：要同主席溝通

民主黨上個月搞咗場「大龍鳳」後，最終係冇人向中委會報名參選立法會。不惜以退黨力勸參選嘅黨內元老、前議員李華明今（7日）出席活動時話一直關心參選事宜，又直言「好多人想我選，包括建制及泛民」，但重申離開立法會已經長達9年，認為自己更適合在另一崗位發揮，又話「重返江湖都沒意義」，承認自己唔會參選。

被問到會唔會退黨，佢話九龍東兄弟姐妹係佢嘅最親密戰友，需要向佢哋交代，又話需視乎立法會選舉之後點情況。另外，佢亦話需要同主席溝通，商討係咪要「做一個寂靜的議員或仍然可以出聲」。

講到部分建制人士至今都未獲得足夠提名參選，佢坦言感意外，又話議會途逾嚟逾清一色。

民主黨早前召開特別會員大會商討會唔會派人參選立法會，最後反高潮冇表決，仲話交畀中委會制定甄選參選機制，最後搞咗個被批評高門檻嘅機制，本來黨員韓東方有意參選，最後都係攞唔夠提名，結果係喺上個月截止提名，冇人遞交提名表格，即係冇人參選。當時李華明曾表明考慮退黨。