政Whats噏：患斑秃變光頭　王卓雅：頭髮未剃已脫光

西貢區前區議員王卓雅過去以一頭長髮示人，惟早前突然透露不堪宣誓無效被追薪嘅精神壓力，而患上俗稱「鬼剃頭」嘅病症。佢尋日(20日)貼文就話收到外界關心，仲話唔少人問佢嘅情況係全脫光定自行剃光啊。

王尋日上載一張滿地髮絲嘅黑白照，話最尷尬就係佢曾有衝動想將頭髮全剃走就算，但一直都未有勇氣嘅時候，頭髮就已自己脫光變成光頭。佢話過去一星期都收到唔少朋友分享曾患上斑禿嘅情況，至於點解會患病呢？佢就曾就此做過唔少資料搜集，然而斑禿嘅病因不明，但有唔少病例都係病發前被其精神或情緒影響有關，亦有部分患者病情會同遺傳及自身免疫系統有關。

雖然王患病，但佢都希望鼓勵一下同受困難嘅女生。佢話唔少香港人對於脫髮問題都特別忌諱，特別係對於女仔脫髮更加會表示驚訝，佢相信唔少人都曾經發生過唔同程度嘅「鬼剃頭」，希望藉住自己嘅故事向其他患者表示「You are not alone」啊。