政Whats噏:泛民爆內訌棄選益建制 邱錦平當選荃灣區會副主席

20211123
東網電視
更多新聞短片
陸靈中承認協調失敗。
經歷區議員離職潮同宣誓風波後,唔少區議會嘅正副主席都懸空,時隔一段時間,各區都似乎暫時「穩定」返,陸續補選咗正副主席嘅空缺。而今日(23日)荃灣區議會都填補咗因李洪波被裁定宣誓無效,而造成嘅副主席空缺。外界原先預料係泛民建制之爭,喺兩邊都有4個區議員情況下,就算4比4打和,都可以抽籤搏一舖。點知泛民妥協失敗爆內訌,互不相讓下竟然棄選,令建制派嘅邱錦平成功「執雞」,佢話冇諗過會冇競爭,強調一直都有心做呢個位。
主席陳琬琛會議一開始就表示只係收到建制派、屬於當然議員嘅邱錦平報名,宣布佢當選荃灣區議會副主席,全場隨即傳出一片掌聲。
其中被傳有意爭做副主席之位嘅公民黨前成員陸靈中,呢個時候就舉手發言,以為有咩想發表,但點知佢係關心新當選嘅副主席喎,話喺網上睇到邱荃灣嘅辦事處同鄉事委員會嘅電話地址一樣,擔心會唔會唔方便市民,仲話副主席之位任道而重遠,公眾對佢有期望。
陸喺完咗大會後,就解釋話每個人都有權選正副主席,自己盡咗力去達成共識。更發聲明承認想競逐該位,對於最終未能成功協調,只有說聲「無奈」,亦有心理準備接受大家對未能成功協調嘅批評。但陸就強調自己盡咗力尋求突破,問心無愧,冇半點後悔,亦都認為自己係適合嘅副主席人選,搵唔到退讓嘅理據。陸就話本身打算利用副主席嘅名義,名正言順地協助無區議員選區嘅居民,可惜最終都事與願違。
而同樣被傳有意想做副主席、亦係公民黨前成員嘅黃家華,喺大會結束後就頭也不回,一支箭咁離開,未有回覆提問,仲話「我架車泊喺下面,抄牌要$320,下晝開會先再講嘢。」
另有泛民議員就不滿結果,指自己特登早到協調,但唔知點解都係協調唔到,覺得唔應該就咁「扯白旗」,仲話4比4都有得搏下,依家喺鷸蚌相爭,漁人得利,要求佢哋同公眾交代。
對於成功喺區議會要職上拎返一席位,邱錦平就話自己無諗過以咁嘅形式當選,稱自副主席空缺後一直有心想做,仲話都預計過可能會4打4等抽籤。被問到有咩大計時,邱就話希望繼續做到城鄉結合,會繼續做同政府溝通嘅橋樑,亦都話會調整下辦公時間方便市民。