政Whats噏：拒宣誓被DQ　前區議員蔡志強現身英國

喺9月首場區議員宣誓中，東區前區議員蔡志強因未出席宣誓儀式而被即日取消資格，及後就冇再有交代去向。不過，佢今日(23日)就喺Facebook(Fb)貼文，透露自己出席喺曼徹斯特中央圖書館舉辦嘅放映活動，換言之佢已離港赴英。

蔡仲上傳咗數張曼徹斯特中央圖書館嘅相片，可見圖書館已設聖誕裝飾，節日氣氛味濃！至於其Fb個人簡介中嘅居住地亦已改為曼徹斯特。

喺政府安排區議員宣誓前，佢已表明拒絕參選宣誓。佢認為宣誓後區議員嘅作用變得一無所有，而現時區議員已變得無權無力，就連原本唯一監察作用都被政權所剝奪，勉強留低只係為歪曲條文背書。佢當時話唔能夠再為居民發聲，對離開議會感到可惜，但強調從政以來佢對得住初心。