政Whats噏:區議員短租議辦3個月 房署搞手續用咗2個月

2021年11月26日 19:17
東網電視
更多新聞短片
房署今次出租安排真令人費解。
話說房屋委員會早前發出信函,話因為依家唔少區議會人數都所剩無幾,而佢哋嘅辦事處亦都人去樓空,為咗物盡其用,打算將房屋署空置議辦重新放租約3個月,直至明年年初。原本呢個計劃,就諗住畀一班有需要區議員租用下,攝下空檔,但點知政府部門秉承做事拖拉嘅精神,淨係程序就用咗2個月,啲有意租用嘅區議員仲未有得用辦事處,就要準備搬走啦!
房委會早喺9月向區議會秘書處發出信函,話房署有122個空置議辦單位,歡迎議員申請租用,但就講明租用期由今年10月中至到明年年初新一屆立法會議員任期開始。而直至10月中,當局再向區議員發出第二次電郵,話再有88個空置議員辦事處可供議員短期租用,租用期就由今年11月上旬開始,同樣係去到明年年初。
多名葵青區議員包括盧婉婷、郭芙蓉同梁嘉銘,3個人喺第一次收到電郵,就分別申請青衣同葵涌區嘅空置議辦,並於9月30日遞交申請表,但礙於各分區租約辦事處行政工作進度不一,結果可謂差天共地。到目前為止,3人當中,只有盧婉婷喺11月初,成功租用青衣長發邨嘅辦事處。
至於梁嘉銘就話連文件都未搞掂,梁表示,房署叫佢簽文件,簽咗幾次都未得,唔知做緊咩,慨嘆話自己喺青衣有個辦事處,想喺葵涌區都有個,咁可以多個服務點,加上區議員宣誓後,少咗好多泛民區議員,好多市民求助無門,希望協助有需要市民,但點知申請程序用咗近2個月,現時都未有得用,但就嚟要還!笑言房署就算有生意眼光,但眼高手低,做唔好囉!
已經攞咗鎖匙嘅郭芙蓉就話新議辨雖然未入伙,但都唔會裝修㗎啦,擺張枱擺張凳就做嘢,反正亦都好快要交還房屋署咁話。
事實上,即便第一批就申請租用,其租期都相當短暫,租用辦事處不足3個月就要搬走,何況係第二批?是否有人願意承租都係問題。但原來即使有議員咁短時間都租,諗住服務更多啲區域嘅居民,但房署都搞到一鑊粥喎。區議員由申請租用至今近2個月,仍未有得用辦事處,就算交咗文件都喺得個等字,真係呢頭搞掂轉頭就要交番畀房署。今次出租安排令人費解,房署真喺要好好檢討下啦。