政Whats噏:視抗逆為終身學習 李慧詩勉勵青少年腳踏實地

2021年11月27日 20:10
東網電視
更多新聞短片
李慧詩勉勵年輕人腳踏實地。
運動員除體能訓練之外,心理質素都好重要。而兩屆奧運銅牌得主、「牛下女車神」李慧詩喺打逆境波方面都好有心得,認為面對逆境同壓力,係一個終身學習嘅過程,勉勵年輕人要好似牛咁勤力,四肢腳踏實地咁努力。
李慧詩今日(27日)出席一個活動時,同過百名青少年舉行分享會,分享年輕人追夢、女性賦權、同面對逆境等話題。李慧詩話希望大家可以轉化球場上學到嘅體育精神,好似佢喺單車上咬緊牙關衝線嘅毅力,應用到學業同生活上。
李慧詩仲攞咗牛嚟做比喻,話牛四肢腳踏實地,而且喺群體生活,寄語年輕人好似牛咁勤力,同隊友互相扶持,學識尊重團隊。李慧詩仲即場展示東京奧運獎牌同埋彩虹戰衣,好多青少年都睇到好開心。
至於今屆東京奧運上勇奪金牌,有「劍神」之譽嘅張家朗,佢嘅母校林大輝中學為左表揚佢嘅成就,下星期仲會舉行「張家朗課室」揭幕儀式。