政Whats噏:長壽但不快樂 林正財嘆老友記善終困難

2021年11月27日 20:18
東網電視
更多新聞短片
林正財話礙於港人一啲固有嘅觀念,以致推廣居家安老係有一定難度。
為應付人口老齡化,政府近年積極推廣居家安老計劃。安老事務委員會主席林正財早前喺一個訪談節目中提到,香港嘅人均壽命雖冠絕全球,然而銀髮族活得並唔快樂,而究其原因,就同長者生活欠缺選擇有關。儘管居家安老係一個唔錯嘅解決方案,但礙於港人一啲固有嘅觀念,以致推廣居家安老係有一定難度。
林正財話香港作為先進地區,無論醫療水平、社會福利、以及緊急服務都算唔錯,人均壽命全球最長,表面睇香港嘅老友記一定過得好好。之但係一睇開心指數,香港長者群喺世界嘅排名好低,仲要差過菲律賓。銀髪族之所以鬱鬱寡歡,林正財認為問題癥結在於長者活得無尊嚴,尤其是因退休而失去工作、年事漸高、身體狀況轉差,同時又面對欠缺選擇嘅情況。
所謂欠缺選擇,林正財以醫療為例,指香港嘅長者縱使輪候醫療系統嘅服務,排期有手術做,但去邊間醫院無得揀、醫生亦無得揀,甚至乎生命最後半年,好多嘢都無得揀。林跟住就指出,港人喺醫院離世嘅比率達九成,屬全球最高,而世上其他先進地方只係約五至六成。林強調話九成呢個數字並非好事,意味住人想喺邊度善終亦無得選擇,難聽啲講句「不得好死」。
林正財又指出香港社會流行一種觀念,就係人老咗就必須入老人院、同埋人生最後階段一定要入醫院。之不過老人家係點睇呢?林話數年前安老事務委員會舉辦大型公眾諮詢,所得嘅結果係八成老人家都寧願喺屋企善終,理由係院舍設施無論有幾咁好,始終及不上自己住嘅「狗竇」。林指居家安老雖合乎長者所需,但亦有意見認為政府卸責,推行居家安老只因唔想起咁多老人院啫。
老人要喺醫院善終嘅觀念,究竟係點樣形成呢?林正財話港人有一個「共識」,若果間屋有人過身就係凶宅,影響物業價值。林話呢種想法可謂世所罕見,指歐洲好多城巿嘅屋齡隨時過百年,都唔知有幾多人喺裏面離世,如果咁都係凶宅,都唔知道成為凶宅幾多次!林話香港一方面好摩登,但有啲觀念就好頑固、唔容易改。所以要推動居家安老呢啲大政策,真係要多費唇舌,等巿民明白長者嘅意願,即使佢哋身體變弱時,仍可喺社區同家居得到妥善嘅照顧。