政Whats噏:由反修例網民成立 侯文健退出天水連線

2021年11月29日 17:03
東網電視
更多新聞短片
侯文健稱,由即日起不隸屬任何政治組織。
喺2019年爆發反對修訂《逃犯條例》風波,有網民成立組織「天水連線」,當時4名骨幹成員更成功當選元朗區議員。不過,因為區議員宣誓問題,有成員相繼辭職,而繼前成員關俊笙6月退出「天水連線」後,另一成員侯文健今日(29日)喺社交平台貼文,表示「本人即日起不隸屬任何政治組織」。隨住2名骨幹成員退出,加上1人正在還押,究竟「天水連線」仲能唔能夠繼續運作落去呢?
「天水連線」係天水圍嘅地區政治組織,喺上年7月21日,有網民發起「元朗7.21一周年遊行」,當日「天水連線」4名區議員冇聽警方警告,並喺商場內聚集,最終4人涉「組織未經批准集結」被捕。當時警方批評4人身為公職人員,但就罔顧公共安全,堅持發起並呼籲市民參與未經批准的公眾活動。
而喺《港區國安法》生效後,該組織嘅成員亦曾喺葵芳港鐵站外擺設街站時,舉起印有「光時」字句嘅橫額,警稱涉嫌違反國安法,要求負責人收起。
佢哋嘅另一位成員伍健偉亦就因參與上年民主派35+初選,涉違《港區國安法》,被控串謀顛覆國家政權罪,喺今年初還押,至5月中旬決定辭去區議員一職,而至今已被還押近1年。而喺伍公布辭職後,有報道引述成員林進確認「天水連線」3名區議員,即係包括佢、關俊笙同侯文健都會宣誓。
但及後傳出政府會對被判定宣誓無效嘅區議員或要償還巨額酬津嘅消息後,隨即掀起區議員離職潮,嚇到一班區議員先後請辭,關俊笙喺6月時因私人理由退出組織,至7月正式辭任區議員,而林進同侯文健喺7月初都辭去區議員職務嘞!
實際上,「天水連線」喺過去一段時間仍然運作,而喺社交平台亦見到呢個組織有同唔同嘅團體合作,然而依家骨幹成員相繼退出,運作又會唔會受影響呢?