政Whats噏:瞓醫院唔老利? 還押林卓廷竟然話幸福

20211130
東網電視
更多新聞短片
林卓廷(箭嘴示)已被還押9個月。
47名泛民主派人士因參與舊年民主派35+初選(47人案),涉違《港區國安法》被控串謀顛覆國家政權罪,當中唔少人正被還押,包括民主黨前副主席兼前議員林卓廷。佢喺社交平台貼文,話尋晚(29日)竟然瞓有床褥嘅床,係佢被還押9個月以嚟嘅第一次,而呢次突然嘅待遇令佢有幸福感喎!
法庭尋日決定押後至明年3月先審理47人案,林卓廷提及好夜先散庭,所以載住包括佢同多名人士嘅囚車返抵赤柱監獄嘅時候,所有監倉都鎖咗門,所以懲教署就安排咗佢哋去赤柱醫院過夜。
佢話一般人肯定覺得瞓醫院好唔老利,但林話尋晚係佢9個月以來最開心嘅一晚,因為「醫院有床褥」!佢仲話瞓咗9個月監獄纖維床墊之後,突然瞓返床褥真係有種幸福湧上心頭嘅感覺。
早前天文台預告天氣轉涼,佢就自爆上次氣溫驟降嘅時候就唔小心凍病咗,患重感冒,所以佢依家都申請咗要張長啲嘅被保暖。