47名發起或參與去年民主派「35+」初選人士，涉嫌違反《港區國安法》，被控串謀顛覆國家政權罪，當中前議員范國威早前申請保釋被拒，仍在還押中。最近天氣轉涼，前議員卲家臻等人尋日(2)就去探范，范就話運動暖身、着短袖衫繼續生活，叫大家唔使擔心。

范國威仍被還押喺荔枝角收押所，話做運動暖身、唔怕凍，當其他囚友着3件衫嘅時候，佢拉筋一陣就可以着短袖衫繼續生活。對於還押咗差唔多1年，佢話已成為資深囚友，習慣牆內生活，幾時會有雞髀加餸都瞭如指掌。

另外，佢話坐監係時間多咗、空間少咗嘅生活，有時間就研究案情同埋讀書，過得頗為充實。同時佢關心其他人嘅聆訊進展，想知邊個瘦得厲害、邊個會一齊做運動、邊個醉心信仰要皈依宗教，覺得大家好似「坐監共同體」咁話喎。