政Whats噏：李華明質疑中委做法　不顧黨紀撐立會非建制候選人

是否容許黨員支持非建制候選人而觸發嘅民主黨黨內裂痕愈掰愈深。該黨元老、前立法會議員李華明希望以個人名義，支持某社福界非建制候選人，其申請雖遭到黨嘅否決，然而李今日(11日)就改用資深社工嘅身份，親自為該名候選人站台，又話預咗會有黨內處分，但會據理力爭以及唔會退黨。

李華明早前向民主黨中委申請，以個人名義支持非建制候選人被拒。而李今日似乎「豁咗出去」，指自己作為資深社工，支持返所屬界別嘅候選人係好合理。又話同該候選人相識達35年，大家都係70年代出道做社工，亦曾一齊共事，唔想立法會清一色。

另外，李華明坦言不滿中委會嘅決定，指民主黨向候選人所發嘅問卷似乎係刻意刁難，而且要將成個民主黨政綱搬落去。至於該候選人喺問卷上嘅答案，李睇完之後覺得同民主黨思路相近，但黨仍否決佢支持該候選人嘅申請，估計係該名身兼選委嘅候選人，早前曾提名一位該黨嘅過氣黨員參選立法會選委界別，中委見嫌從而唔想有黨友公開支持佢，成件事根本就同問卷無關。

至於黨友李洪波以個人名義，支持另一名非建制候選人則獲中委批准，李認為民主黨取態不一，好明顯喺針對人，覺得不能接受同失望。當提到該黨身兼中委嘅副主席梁翊婷，同樣未經中委同意下支持另一位非建制候選人，李指自己並非黨內領導層，情況不同不能比較，但就體諒梁嘅做法，指後來諗深一層，中委嘅決定實在兒戲。雖然中委否決申請已成事實，但李仍埋怨中委嘅處理程序太緩慢，指自己申請咗好耐，唔明點解要拖咁耐喎。李又指民主黨唔可以自己友繼續「圍威喂」，直言再咁樣落去，民主黨會好大件事。

李華明坦言，明白自己今日嘅舉措係挑戰中委，亦都可能有中委覺得唔高興，但強調會為自己解釋，又話大家講道理，預咗有懲罰，但會據理力爭，而尋日都通知咗主席羅健熙，不過就無得到回覆。至於有無考慮過退黨，李承認早幾個月確有退黨念頭，但後來見黨友挽留，暫且放下自行退黨嘅想法，因為咁做就好似理虧咁喎。