政Whats噏：涉違國安法還押近3個月　王逸戰話多咗時間增值

已解散嘅學生組織「賢學思政」召集人王逸戰涉違《港區國安法》，被控串謀煽動他人實施顛覆國家政權罪，由9月底至今已還押近3個月。佢嘅親友早前就喺其Facebook(Fb)貼文，話專頁會由佢哋接手，以分享王嘅還押生活，其中仲引述王話喺囚中多咗時間學習，算係多一個增值自己嘅機會咁話。

王自還押後Fb就冇再更新，佢嘅親友早前就貼文話由於王還押咗接近3個月，呢幾個月都好少同外界交流，喺得到王授權下，佢哋會暫時用呢個帳戶同大家分享王嘅獄中生活。貼文中又轉達王嘅說話，話囚中生活只係較枯燥，但同時亦比以往多咗空閒時間閱讀同學習，或者都係增值自己嘅機會喎。

今年9月警方國安處上門拘捕王，並帶走多箱證物，指該組織曾發表危害國安言論，例如喺疫情初期呼籲港人唔好使用「安心出行」，又強調「光時」屬於民族信念並非口號等。佢曾提出保釋覆核但被拒，需要繼續還押。