政Whats噏：還押逾半年獲釋　陳志全與伴侶視像方式作海外註冊

立法會前議員陳志全(慢必)因參與去年民主派「35+」初選，涉違《港區國安法》，被控串謀顛覆國家政權罪。佢還押逾半年後，終於喺今年9月獲准保釋，最近仲有喜事發生，原來佢同伴侶要拉埋天窗喇！

慢必喺2012年當選議員後，就公開自己係男同性戀者，屬於香港首位公開「出櫃」嘅議員，過去一直關注同性平權嘅議題。雖然喺香港同志婚姻仍未合法，不過亦無阻佢同伴侶攜手步入人生新階段。人民力量前主席袁彌明今日(15日)就喺Facebook貼文，話「亂世中有愛，送上無限祝福」，並上載慢必同伴侶身穿西裝、手執小棒花，及兩人互相親吻嘅相片，場面好溫馨啊。原來兩人係喺香港透過視像方式，於美國猶他洲作海外註冊結婚。

其實喺慢必還押期間，佢嘅伴侶多次被影到前往收押所探望慢必，今次都真係患難見真情啊。