疫下終能同枱食飯　酒樓做冬嗌餸手鬆　食客：要賀一賀

今日(21日)冬至，按照傳統會舉家一起食冬至飯，不少家庭則選擇到酒樓「做冬」。東網記者在今晚約7時到旺角倫敦大酒樓視察，發現多層座無虛席，不少人均一家大細共坐一枱，場面墟冚，通道仍有多人等候職員安排座位。

社交限制下，市民連續多個佳節未能齊人食飯，阮先生表示，一家12口相隔一年方能同枱食飯，指上年需要分枱，氣氛較差，今年很開心能一同享用佳餚，稱這樣才是團圓。阮又表示，今年不止點了特價菜式，更點了鮑魚、花膠、海蝦、雞等貴價菜。身為一家之主的他笑指，「好耐未試過咁開心」，要「賀一賀」，又指有消費券加持，令他更疏爽，亦不介意「貼錢食好啲」。

另一食客林女士表示，今年特意到酒樓用饍，認為氣氛較在家「做冬」好。早在半個月前已經訂席，並特意邀請母親及姨母共同過節。她表示今次多叫了羊腩煲、龍蝦伊麵等菜式，預算約2,500港元，較一般飲茶使多近2,000蚊，即使已用畢消費券，仍連呼「開心就無所謂」。