政Whats噏:吳文遠首次獄中過生日 預錄片自嘲係「叉燒」 

20211227
東網電視
更多新聞短片
吳文遠喺獄中度過45歲生日,自嘲自己係「叉燒」。
呢一年嚟社民連核心成員相繼入獄,其中秘書長吳文遠因前年10.1及10.20非法集結案,被判囚14個月零14日。佢入獄前預錄多段影片慶祝多位政界好友生日,今日(27日)係佢首個喺獄中度過嘅生日,其Facebook尋晚(26日)上載咗一段預錄影片講下生日感言。佢笑言今次拍片係「刷一下存在感」,喺片中就感謝媽媽生咗佢呢塊「叉燒」,仲希望出獄時可以收到生日禮物添!
佢喺片中自嘲係「叉燒」,多謝佢媽咪有咁大勇氣生呢塊「叉燒」,又話自己45年前係「大喊拾」,數十年嚟不斷做啲佢估唔到嘅事,包括依家坐監。佢笑指今次純粹拍片「刷一下存在感」,回顧過往45年,佢並無中年危機,日子都算過得唔錯,咁多年嚟都唔會點慶祝生日,亦都無太多人知道佢生日,盡可能都係靜靜地度過,因為對佢嚟講只係「any other day」。不過,即使坐過幾次監,今年係第一次喺監獄中度過生日,所以想分享感受喎。
社民連多位成員相繼入獄,佢提到多位在囚嘅朋友有上咗年紀嘅前支聯會主席李卓人同社民連成員梁國雄(長毛),亦有較年輕嘅社民連前主席黃浩銘同成員陳皓桓。佢話佢哋可以喺獄中好好生活,除咗無自由之外,佢哋唔需要為抉擇而煩惱。之不過,唔少家庭因而失去經濟支柱,要為生活奔波,亦有小朋友會惦掛父母,所以獄外嘅家人要應付呢啲政治打壓,其實係更加辛苦。
至於生日想收到乜嘢禮物呢?佢就話唔太需要聖誕卡,因為賀卡好多時有限額亦有機會收唔到,所以不如買份生日禮物擺喺櫃桶,等佢出獄時送畀佢,仲搞笑咁話想要遊戲機或者攪拌機喎。