政Whats噏：管浩鳴黃國4新丁獲立會辦公室　工聯會10樓搬8樓

新一屆立法會議席將由70席增至90席，議員辦公室唔夠用，所以有一半議員要暫時到中信大廈嘅臨時辦公室辦公，而現時立法會大樓內嘅議員辦公室可供全部連任議員使用外，剩餘4個辦公室供議會「新丁」抽籤。立法會秘書處今日(28日)就進行抽籤，最後抽中黃國、管浩鳴、陳仲尼同梁文廣4人，而工聯會嘅議員亦都會由本身喺10樓辦公，搬去8樓。

據了解，4間供抽籤嘅辦公室當中，3間喺8樓，1間喺6樓，其中6樓屬民建聯嘅議員，雖然民建聯今屆有19個議員，但因為一個樓層只可以畀14個議員辦公，所以該黨有5位議員需要去中信辦公喇。至於工聯會嘅黃國，就話自己會去立法會大樓8樓嘅辦公室，加上10樓同埋11樓嘅辦公室會進行改建工程，所以其他工聯會嘅議員都會由原先嘅10樓搬去8樓，最後將會有5人留喺8樓辦公室，吳秋北、陳穎欣、梁子穎3人則需往中信大廈辦公。黃又補充，中信辦公室嘅安排係先畀議員選擇位置，若果有競爭先會再抽籤。

另一位抽中立法會大樓辦公室嘅梁文廣就話，之前助理見到電郵指可以抽籤，結果就抽中咗喇。梁話雖然去邊度辦公都無所謂，但都想有啲私隱，而咁啱8樓都有佢所屬嘅經民聯老友記做鄰居。講起經民聯，大部分該黨嘅議員就會原封不動咁留返喺7樓辦公。據悉，唔再連任嘅石禮謙嘅辦公室會讓畀今次選委會界別「票后」梁美芬，至於連任失敗嘅張華峰，其辦公室就會畀新人陸瀚民。

喺立法會大樓擴建工程完成之前，部分議員要喺臨時辦公室辦公，而候任議員早前曾參觀立法會大樓同埋中信大廈嘅臨時議員辦公室，當時就有議員憂慮臨時辦公室嘅公共工作空間私隱度不足，但立法會主席梁君彥強調冇呢個問題。而立法會嘅工程亦進行得如火如荼，其中會議廳內新增座位嘅工程已經完成，立法會會議廳座位本身可以擴展至容納120位議員，新一屆議會增至90席，已經喺議事堂中間位置新增咗兩排座位，每排5個，合共12個座位。而喺立法會公眾席旁邊，都增設咗新嘅議員座位布局表，議事廳坐滿90人後仲有6個空位。