政Whats噏：野豬「深入民間」　葉劉斥餵飼行為不智

政府早前宣布，因為本港野豬問題太嚴重，決定將市區捕捉到嘅野豬人道毀滅。獲連任嘅議員葉劉淑儀都發現野豬問題，源於日前有隻野豬進入黃竹坑鄉村俱樂部，嚇親一班會員。葉劉話證明野豬已經「深入民間」喇，但最大劑嘅係，仲有好多人以愛心為名餵飼野豬啊。

葉劉今日(2日)喺Facebook發文，指日前一頭中等身型的野豬，闖入鄰近海邊嘅黃竹坑鄉村俱樂部，到達泳池旁邊，相信野豬因為聞到會員享用早餐嘅味道而至，但就嚇親一班會員啊，最後由警員同埋漁護署職員到場將野豬帶走先平息事件。

葉劉話事件顯示野豬已經「深入民間」，佢覺得野豬喺野外生活當然沒問題啦，但若闖進人類聚居嘅地方，就會對市民造成極大滋擾，甚至發生意外。佢話弊在仲有唔少人出於愛心餵飼野豬，其實呢個行為真係好不智啊！除咗餵野豬，葉劉又記起，喺選舉期有唔少市民向佢投訴，仲有人餵飼白鴿添啊。佢指餵飼野生動物會影響衛生環境，必須正視，新一屆立法會即將開鑼，佢到時一定會跟進相關問題喎。