政Whats噏:3界別聯繫人入行管會 部份委員會正副主席未傾掂

2022年01月10日 18:00
東網電視
更多新聞短片
議會「新丁」楊永杰料代表地區直選界別加入行管會。
立法會本周三(12日)舉行首次會議,隨後陸續選舉各個委員會正、副主席。據了解,行政管理委員會成員由建制派「正副班長」、3大界別聯繫人及政黨代表組成,而建制派各板塊代表今(10日)碰頭,初步討論18個事務委員會正、副主席人選,部分較少競爭嘅委員會主席,擬由連任議員繼續擔任。但由於事務委員會人數設限,議員可謂「爭崩頭」,所以部分委員會正副主席人選都有待商榷。
行管會方面,據了解,成員包括主席梁君彥之外,料仲有建制派「班長」廖長江、「副班長」李慧琼;3大界別6大聯繫人,即地區直選有陳克勤、楊永杰;功能組別陳振英、邵家輝,及選委界別嘅馬逢國及麥美娟。另外,亦有4人屬政黨代表,包括張宇人、葉劉淑儀、盧偉國同吳秋北。
據悉,初步料盧偉國及謝偉銓分別任工務小組委員會正副主席、人事編制委員會主席由葉劉淑儀出任、議事規則委員會主席繼續由謝偉俊擔任,至於立法會政府帳目委員會主席料為陳振英,接替未有競逐連任嘅前主席石禮謙。
建制派初步傾向大部分事務委員會主席「照舊」由舊人坐多陣,或作最少調動。例如,由張國鈞任司法及法律事務委員會主席、周浩鼎任政制事務委員會主席、梁美芬任教育事務委員會主席及陳克勤任保安事務委員會主席。部分事務委員會人選有所調動,包括謝偉銓或接替盧偉國任發展事務委員會主席,至於房屋事務委員會主席一位亦較搶手,最後料麥美娟任房屋事務委員會主席。
至於作為議會中唯一嘅非建制派議員、社福界狄志遠就話得悉今日有相關會議舉行,但就未有參與。佢又話希望首選係加入福利事務委員會,並競逐副主席一職。但據了解,原來唔少議員對福利事委員會主席一位都好感興趣,所以至今都未能協調成功。
之不過,由於現時議員只可加入最多6個事務委員會,故第一步仍要先協調加入事務委員會問題,及後先可討論副主席人選,而一眾議員就最遲要喺本周五(14日)前提交加入事務委員會嘅回條。