政Whats噏:電郵太多漏報財委會 陳曼琪申逾期加入

2022年01月17日 14:13
東網電視
更多新聞短片
陳曼琪申請逾期加入財委會。
喺新一屆立法會會期,議員唔再被強制加入財務委員會,但90名議員中都有83人主動加入。唔計主席梁君彥,仲差6名議員,其中陳曼琪(Maggie)上周四(13日)就去信財委會主席陳健波,話明白財委會對審核及批准政府公共開支有至關重要嘅角色,經過審慎考慮後希望申請逾期加入委員會。之不過,點解依家先提出申請呢?Maggie就話原來係漏咗申請啊。
Maggie解釋,話原本都打算加入內務委員會同財委會,最初由於過多電郵造成混亂,以為已加入兩個委員會,但及後見到有報道指佢未有加入財委會,所以佢即刻翻查記錄。佢發現原來未有加有財委會,所以依家提交再逾期加入嘅申請。雖然未正式加入委員會,但佢上周五(14日)亦有出席財委會特別會議提問。
財委會秘書表示,根據《財務委員會會議程序》第2A段,逾期參加財委會嘅申請應否獲接納,將由委員會決定。而陳健波表示,Maggie逾期參加財委會嘅申請,將喺財委會首次例會上考慮。