政Whats噏:立會事務委員會提名出爐 僅司法副主席有競爭

2022年01月21日 17:52
東網電視
更多新聞短片
立法會各事務委員會會議將於下周展開,首先會進行正副主席選舉。
立法會各事務委員會喺本月25日舉行選舉主席、副主席嘅議程,不過今日(21日)公布有效提名,結果18個委員會主席全數冇競爭,副主席方面只有司法及法律事務委員會出現競爭,由議員容海恩同議會新丁、法律界議員林新強搶奪副主席一職。另外有13個委員會嘅副主席就由新丁擔任。
立法會秘書處今日公布各事務委員會嘅有效提名,結果18個委員會嘅主席全部由上屆議員接手,其中10個事務委員會主席成功冧莊。副主席方面,議員劉國勳成功連任發展事務委員會副主席;議員劉業強擔任環境事務委員會副主席;重返議會嘅陳凱欣同埋鄧家彪分別擔任衞生事務委員會,同埋福利事務委員會嘅副主席。
至於唯一出現競爭嘅就係司法及法律事務委員會副主席一職,由容海恩同林新強競爭。本身上年係保安事務委員會副主席嘅容海恩話,因為黨內得5個人,喺各事務委員會得1個席位,決定由議員黎棟國負責保安事務委員會嘅議題,而佢上年係司法及法律事務委員會委員,今年有興趣爭取副主席一職。對於出現競爭,佢話事前都唔知,不過大家各自有優勢,就公平競爭啦,呢幾日都會瘋狂打電話拉票喇。
另外,喺18個事務委員會正副主席人數方面,民建聯佔據7個主席同埋2個副主席席位;經民聯有3個主席同1個副主席;工聯會就有3個主席同1個副主席;自由黨都有3個主席位;G19拎到1個主席同4個副主席;新民黨最少拎到2個副主席。
其實本身選舉委員會正副主席程序方面,候選人係可以自我介紹政綱、接受提問等,但上屆就出現有議員濫用程序拉布。之後,上屆立法會就通過修訂《議事規則》,列明立法會各委員會嘅選舉主席程序方面,將會由立法會秘書處收到有效提名後再進行選舉會議,主席選舉需30分鐘內完成,否則休會。變相都唔會再出現拉布情況喇。