政Whats噏:政界揶揄虛擬遊學團 「受啟發」紛紛舉辦線上遊

2022年01月22日 18:09
東網電視
更多新聞短片
劉國勳話組織北都視像考察團,保證天天出發。
喜歡遊埠嘅港人因疫情關係,已經兩年無得出門,學生哥嘅遊學計劃亦難免告吹。不過近日有辦學團體舉辦虛擬遊學團,安排小五及小六學生透過電腦螢幕,進行為期兩日嘅日本京都線上遊。而整件事嘅焦點,唔係話點樣遙距參與摺紙、或製作壽司等文化活動,而係原價750元嘅報團費用!並由此激起網民一片熱議,就連政界人士亦出嚟「抽水」,譬如議員劉國勳就照辦煮碗,舉辦新界北虛擬探索之旅,至於領隊同導遊都係都由佢一手包辦咁話。
劉國勳日前喺社交平台上載一段短片,留言指北部都會區發展計劃公布以來,不少企業或團體都要求佢帶團考察,然而近日礙於疫情而停頓。不過佢見到某辦學團體所舉辦嘅虛擬遊學團「突破盲腸」,於是佢都立即安排個「眼睛賞北都視像考察團」,邀請大家一齊參與,不但由佢身兼領隊同導遊,且保證成團、天天出發、人數不限,而最重要就係團費唔使750元。
西貢區前區議員鄭仲文亦都唔「執輸」,喺社交專頁揚言要組織一個將軍澳坑口線上遊並由佢親自帶團,行程包括坑口天后廟、坑口巴士總站、文曲里公園、同埋西貢對面海邨,而團費只收7.77元。之但係,若果要進行代為求籤及解籤等「文化活動」,咁就要收取附加費用。有網民問佢,有無代購手信環節呢?佢就話有親手寫嘅開運揮春。而團友亦可自選增減行程,當然需另外收費啦。至於要幾多人至可以成團呢?佢話有100人報名就會即刻帶隊「找數」,講到「實牙實齒」咁喎。
現時經營文化旅遊嘅食物及衞生局前政治助理陳智遠,就話有唔少人問佢,該辦學團體嘅虛擬遊學團到底有無得搞?亦有人問佢,可唔可以帶大家網上遊日本,透過視像會議程式隔空食壽司?佢話好認真咁講,佢與同事其實正籌備「網上遊學」,不過當然唔係咁玩法。但佢勢估唔到真係有人咁破格,將一個實體遊學團,全程100%變成線上,令佢不禁由衷佩服。儘管有網民認為該辦學團體「食水深」,但陳智遠就覺得以兩日線上行程而言,呢個價錢其實唔算貴㗎喇。