政Whats噏:被街坊誤認「周議員」 何俊賢「黑人問號」

2022年01月23日 02:00
東網電視
更多新聞短片
何俊賢慨嘆自己擔任議員多年,仍不時畀人誤認或叫錯名。
自己被認錯係另一個人,場面尷尬到極。有「高佬賢」之稱嘅議員何俊賢,儘管其鶴立雞群嘅身高十分出眾,亦不時遇到畀其他人認錯嘅窘態。日前佢就喺網絡視頻中,慨嘆自己擔任議員多年,至今無論喺公眾地方還是議會,仍不時畀人誤認或叫錯名,真係莫名其妙咁話。
何俊賢憶述舊年立法會換屆選舉期間,某日佢落區遇到一位街坊,對方一見到佢就話好欣賞佢嘅議會表現、大讚佢敢言,滔滔不絕咁講咗差唔多5分鐘,最後對方話支持佢連任,之不過對方竟然係話「周議員」喎!登時一頭「黑人問號」嘅何俊賢,片刻之後先至意會到自己當時置身屯門,正值係黨友周浩鼎嘅選區。佢笑言自己不但靚仔過周浩鼎,兼且高佢半個頭,咁都畀人認錯,實在費解呀!
何俊賢又提到自己日前出席今屆立法會第一次財務委員會,期間財政司司長一時口誤,叫錯自己做「何俊仁」。何俊賢話或者大家太過懷念何俊仁喺議會裏面嘅搞笑時代啦,況且佢喺議會裏面公然睇模特兒性感艷照嘅出位舉動,予人嘅印象同「名氣」又的確係強過自己。