政Whats噏:承認非經商之才 朱江瑋:有錢賺都係「虛火」

2022年01月23日 03:00
東網電視
更多新聞短片
朱江瑋認為自己打工收入會高過開舖做老闆。
油尖旺前區議員朱江瑋喺舊年9月,被政府裁定未能通過宣誓而失去議席之後,旋即下海從商,經營網購零售生意。日前佢透過社交平台交代近況,慨嘆做生意艱難,況且自己亦非經商之才,就算盤生意做到收支平衡兼有些少利潤,都恐怕係「虛火」咁話。
朱江瑋話有街坊不時問佢,到底開舖搵唔搵到食㗎?佢好坦白咁話「好難」,尤其係自己呢啲唔適合做生意嘅人,成日覺得賺人錢個心好唔好意思,每次加價都好似罪大惡極,咁實搞唔掂啦。但幸好佢遇到嘅客人都幾疏爽,買嘢唔睇銀碼,有時仲唔使找錢添!結果佢間舖經營唔夠兩個月,請埋伙記之下都可以達到收支平衡。但佢相信呢啲都只係「虛火」,擔心農曆年過後先至係真正嘅捱世界。
佢又提到,有當區嘅街坊肯幫佢做伙記,喺佢創業最困難之時出手相助,仲要返工準時放工例牌遲走,大讚咁嘅同事真係唔知邊度搵。只不過呢位同事只應承做到年尾,將來係點,將來再算。雖然創業短時間內回到本,但佢話過咗農曆年等盤生意穩定左就會出去搵工,認為打工收入會高過開舖做老闆喎。