政Whats噏：梁繼昌飲茶遇「不速之客」　囡囡差啲中招？

疫情肆虐，大家都更加注意衞生。不過有食肆嘅衞生睇嚟就出咗啲問題，事關前會計界議員梁繼昌尋日(22日)一家人去飲茶時，佢嘅囡囡食食下蝦餃竟然遇上「不速之客」，爭少少就中招添啊，究竟呢個「不速之客」係何方神聖呢？

話說梁繼昌尋日喺Facebook貼出一張蝦餃嘅相，清楚見到一隻差唔多有半隻手指公咁大嘅蟑螂喺上面。梁話囡囡已經將成個蝦餃放咗入口，覺有異樣立即吐出，先至赫然見到有隻「小強」！佢叮囑囡囡呢幾日要留意身體有無唔舒服，如果有就要即刻睇醫生。

佢話為免影響其他食客，當時縱有不滿亦無疾言厲色，反正酒樓有向佢哋道歉、加送甜品以及取消該點心嘅入帳。佢話暫時未報食環署，會喺聽日(24日)聯繫。佢又認為酒樓應該要正本清源，搵出食物有蟑螂嘅原因，尤其喺疫症期間更加要注意衞生啊嘛。