政Whats噏:「洪門宴」官員議員自我監察明完結 徐英偉復工期未定

2022年01月23日 17:34
東網電視
更多新聞短片
徐英偉何時復工仍係未知之數。
因密切接觸者檢疫期縮短,出席「洪門宴」需隔離嘅3位官員及4名議員上周一(17日)獲安排提早離營,佢哋同另外11位曾出席晚宴嘅官員將於明晚(24日)完成7日自我監察期,如無意外可以喺本周二(25日)復工。有涉事議員話,呢段期間都在家工作,今日(23日)取得檢測結果為無確診後,計劃明日返回立法會工作。至於民政事務局局長徐英偉幾時可以復工呢?據了解仍係未知之數啊!
根據安排,7日自我監察期唔設外出限制。早前需要入住檢疫中心嘅議員洪雯話,自我監察期間除咗進行核酸檢驗外,盡量都避免外出。佢形容心情「歸心似箭」,希望可盡快返回崗位工作,周二就會復工,出席多個立法會事務委員會會議,討論來年工作方向。
經民聯、選委界別議員陸瀚民亦指,呢段期間都喺屋企工作,線上觀看立法會會議直播,每日透過Zoom同議員辦事處同事開會、同議辦應徵者會面及面試。至於一日三餐,則喺屋企煮食或叫外賣,等送遞員放喺座頭再領取。佢又話每日探熱都正常,尋日(22日)亦收到最後一次檢測報告結果為無確診,現時正準備周三(26日)立法會會議,冀可以趕快歸隊。
另一選委會界別議員陳仲尼則話,尋日進行核酸檢測,結果為無確診,而早前全部時間都留喺屋企自我監察,期間透過立法會直播收睇大會、內務委員會及財務委員會會議。至於科技創新界議員邱達根就表示,主要都係在家工作,至今日得知檢驗結果為無確診後,就終於可以陪家人外出及去跑步,並計劃明日返回立法會。
就涉事官員復工安排方面,曾喺檢疫中心隔離嘅徐英偉及發展局局長政治助理馮英倫等3位官員,與其他11位參與晚宴嘅官員需要利用自身假期,完成必須嘅檢測、待結果確定為無確診及完成自我監察後先可以恢復上班,但據悉被特首點名指對其行為感失望嘅徐英偉,就仲未知幾時可以復工喇。