政Whats噏：蒙兆達同老婆同床異夢　各自夢見李卓人、長毛

正所謂「日有所思，夜有所夢」，夢境同現實世界總有關聯。前香港職工會聯盟(職工盟)總幹事蒙兆達，去年職工盟解散前已離港赴英，但佢近日竟然同枕邊人都喺睡夢中見到香港嘅朋友，之不過夫婦二人夢中所見嘅對象都唔同，確係「同床異夢」咁話。

蒙兆達日前喺社交平台貼文，話說有一晚佢夢見前職工盟秘書長李卓人，而夢中佢哋仲一齊開懷食大餐添。但現實中，李卓人因前年8.18、8.31、10.1以及去年6.4集會案，被控組織及參與未經批准集結等罪，被判囚20個月，目前身陷囹圄滿腹牢騷，之前嘅聖誕感言曾埋怨無聖誕大餐食，莫非夢境同現實都係相反嘅？

點知當蒙同老婆講起呢個夢，佢老婆竟然都發咗個夢喎，但就唔係夢見李卓人，而係夢見同在獄中嘅前議員梁國雄(長毛)啊！蒙氐夫婦夢見在囚友人，惹起一啲網友留言話有相同經歷，譬如前社福界議員邵家臻，就話自己都曾經夢見因前年民主派初選案、涉違《港區國安法》、還押待訊嘅前議員譚文豪喎！